خلووووووووووووها
حامد :
يا مساعد بيض الله وجه صدمات الليالـي
. . . . . . . . علمني كيف أعرف اللي معي واللي عليه
لعنبو جد الطعون إن جات من غالي لغالي
. . . . . . . . ولعنبو جد الخوي اللي يجنب عن خويـه
مساعد :
كل شي ٍ صار في دنياك درس ولا تبالـــي
. . . . . . . . ضربة ما تقسمك نصين تدفع عنك سيــــه
ما جرى لك من صدوف الوقت ياحامد جرالي
. . . . . . . . لكن أساير ظروف الوقت وعزومي قويـــه
حامد :
أبتسم وأضحك وأجامل وإلا أنا مانيب خالـــي
. . . . . . . . يامساعد ليت ربعي يعرفون اش صار فيــــه
إن ضحكت أضحك معاهم وإن بكيت أبكي لحالي
. . . . . . . . والرجل لو ما فزع لك طيب يفزع لك حميـــه
مساعد :
لا تبينها ترى راس النبا يكشف مفالـــي
. . . . . . . . كان ما تفرح بعيد الفطر تفرح بالضحيــة
السما والأرض وثمار الشجر يابن الحلالي
. . . . . . . . علمن نيوتن اللي مـات سر الجاذبيـــة
حامد :
كيف أجنب عن حقوقي والعطا من راس مالي
. . . . . . . . العطيـة بالعطيـة والخطيـة بالخطيــــة
يعلم الله لا اجتمع عنتر وأبو زيد الهلالـــي
. . . . . . . . ما أعذلوا قيس الملوح عن غرام العامريــة
مساعد :
قبل كسب الحق الأقصى قوم للحق الموالـي
. . . . . . . . وانشد القاضي عن آخر محكمة للعنصريـة
وش بقى للسيف والبندق وحماي التوالــي
. . . . . . . . في زمان العولمه وأهل العلوم الشقلبيـــه
حامد :
ما تعرف إن الحقوق حقوقنا بأول وتالـــي
. . . . . . . . الحقوق التالية وإلا الحقوق الأوليــــــة
كل ما دارت عليك الدايره خلك شمالــــي
. . . . . . . . ما يضيق خاطرك صوت الفشق والبندقيــة
مساعد :
البروق تلوح في عرض السما والسيل سالـي
. . . . . . . . ما تموت من الظما لو عرضوك المهمهيـــة
نصبوك أهل العقول الحالمة في الشرق والـي
. . . . . . . . ما عليك خلاف مهما صار والذمـة بريــه
حامد :
لا تبري ذمتك يا مضرب الرجل المثالــي
. . . . . . . . من يعيش بلا هدف بيعيش مجهول الهويـة
والله إني معطي المحتاج من لقمة عيالــي
. . . . . . . . مير ملعون الجدف ما بينت فيه العطيــه
مساعد :
الزمان اللي صفا لك وأنت غافل ما صفالـي
. . . . . . . . خلها تمشي على درب السنع واقبل هديــة
أنت ما خليت فيها لا جنيه ولا ريالــــي
. . . . . . . . صار لك مدة تقارن بين داب وبين حيــة